Nangrugin ti panakamobilize wenno panakaideploy dagiti maseknan nga indibidwal iti Lower Rock Quarry Barangay, Baguio City para iti panakabantay ti drainage iti City Camp Lagoon kagiddan ti mapaspasaran a panagtudtuddo.
Iti panakiuman ti Bombo Radyo kenni Silvino Cominga Jr., kapitan ti Barangay Lower Rock Quarry, nabilin dagitoy nga i-reactivateda ti Barangay Disaster Risk Reduction and Management Council dagitoy kas panagsagana iti pangta a posible nga ipaay ti panniempo partikular ti bagyo a ni Carina.
Sigun kenni Cominga, nangipatungpal dagitoy ti panagdalus iti drainage iti paset ti City Camp Lagoon gapu ta naobserbaran nga ado dagiti naipullat a basura iti daytoy idi napasaran ti panagtudo.
Innayon ni Cominga nga aglalaok a basura ti naibelleng wenno naiyanod iti nasao a drainage pakairamanan dagiti pimmusay a dingwen ken nagduduma a klase ti plastic.
Kagiddan dayta, pinagyamanan ti nasao a kapitan dagiti kameng ti City Engineering Office a nanghakot kadagiti basura.
Kasta met a binigbeg ni Cominga ti presensya dagiti kameng ti pulisya a regular nga agminmonitor iti nasao a lugar.//Bombo Rob Dominguez
