BAGUIO CITY – Agtultuloy iti panangdalus ti Philippine Drug Enforcement Agency (PDEA) – Cordillera kadagiti babbarangay ditoy rehiyon Cordillera kontra iti iligal a droga.
Sigun kenni PDEA-Cordillera Regional Director Gil Castro, dumanon laengen iti 47 a barangay ti manarimaan a tuttutukanda tapnu naan-anay a madalusan ti rehion manipud iti iligal a droga.
Maibasar iti datus ti PDEA-Cordillera, 70% kadagiti barangay iti rehion ket nadalusanen manipud iti iligal a droga bayat a 15% dagiti nakamintinir ti estado dagitoy a drug-cleared ken 15% ti agdama a daldalusan dagitoy.
Impettengna a napateg ti Barangay Drug Clearing Program para iti naan-anay a panakapukaw ti iligal a drogra kadagiti barangay babaen iti panakakissay dagiti drug personalities kadagitoy nga agresulta pay iti panakapukaw ti suplay ti iligal a droga.
Kagiddan iti daytoy, dinayawna ti Baguio City gapu iti political will daytoy a mangparmek iti iligal a droga.
Naamuan a ti Baguio ti nakailista iti kaaduan kadagiti nakemkemmeg nga aglablabsing iti Comprehensive Dangerous Drugs Act of 2002.
Pagyamyamanan pay ni Castro dagiti lokal a gobyerno iti Cordillera gapu iti agtultuloy a panakibinnadangda tapnu maparmek iti iligal a droga ditoy rehiyon.
Kabayatanna, iti agdama ket nangbukel ti PDEA-Cordillera iti alyansa kadagiti met vegetable dealers ken truckers association iti lokalidad tapnu malapdan ti panakaibiahe dagiti iligal a droga pastrek ditoy rehiyon.
