BAGUIO CITY – Imbilinen ni Mayor Benjamin Magalong ti panakai-lockdown ti San Vicente Barangay ditoy siudad ti Baguio gapu kadagiti panaglabsing iti pagalagadan ti Enhanced Community Quarantine (ECQ) gapu iti COVID-19.
Sigun kenkuana, naobserbaran ti panaglabsing dagiti residente sadiay kadagiti pagalagadan ti ECQ kas iti panagwalang-walang dagitoy iti ruar a saan a naka-facemasks ken iti saanda a panag-obserbar iti physical distancing.
Kinunana nga agpaut ti pammilin iti lockdown sadiay agingga nga adda ti ipaulogna a baro a pammilin para iti panakawaswas ti nasao nga estado.
Gapu iti daytoy, suspindido ti panakaipaay ti quarantine pass kadagiti residente ti San Vicente ken dagiti laeng authorized person outside residence ken addaan medical emergencies ti mapalubusan a rumwar ken sumrek iti barangay.
Innayonna nga adda ti maipatulod sadiay a rolling store tapnu adda ti paggatangan dagiti umili iti pagkasapulan dagitoy bayat a dagiti dadduma a pakaseknan ket nasken a maikoordinar kadagiti barangay officials.
Kinuna ni Mayor Magalong nga agtultuloy ti panagwanawan ti surveillance team ti lokal a gobyerno kadagiti maaw-awatda a report seknan iti saan a panagtungpal dagiti residente dagiti barangay kadagiti paglintegan ti ECQ.
Imballaagna pay a no mapatgan ti localized community quarantine ti Baguio inton May 1 ket agtalinaed latta a naka-lockdown dagiti immunan a naipasidong iti lockdown.
Dinakamatna nga agserbi daytoy a patas a ballaag kadagiti amin a bumarangay ken dagiti opisyal dagiti 128 a barangay ti Baguio.
