BAGUIO CITY – Nakemmeg ti maysa a menor de edad a lalaki gapu iti panag-imetna iti iligal a droga sadiay Interior Kayang Extension, Baguio City idi rabii kalman.
Ti suspek ket 16-anyos a tubo ti Cabiao, Nueva Ecija ken residente ti Palma Urbano Street, Baguio City.
Maibasar iti blotter ti pulisya, nakaawat ti maysa kadagiti barangay official ti Kayang Extension iti awag seknan iti manarimaan a pot session wenno panag-aramat ti iligal a droga iti uneg ti maysa nga abandonado a pasdek sadiay.
Dagus a nagresponde dagiti barangay officials ken iti panagresponde dagiti pulis, impaimada kadagitoy ti nasao a barito.
Nakumpiskar iti barito ti maysa a pink sling bag a naglaon ti tallo a nabalkot a napagango a puon ti marijuana ken fruiting tops, lighter ken maysa a pakete ti napagango a tabako a mapapati a marijuana leaves.
Naamuan a nakalibas dagiti kakadwa ti nasao a barito iti nasao a pot session.
Naiturong ti barito iti istasyon ti pulisya ken naipilan ti kaso kontra kenkuana a panaglabsing iti linteg, partikular ti iligal a panag-imet ti iligal a droga.
