Kinumpirmar ti Department of Health (DOH) a nakastrek iti Pilipinas ti baro a COVID-19 subvariant KP.2 a maaw-awagan iti Flirt.
Sigun kenni Department of Health (DOH) Assistant Secretary Albert Domingo, addan dagiti immuna a kaso ti nasao a sakit nupay kasta saan dagitoy a nakita a dagus gapu iti kinakurang ti panagresearch dagitoy.
Maibasar iti datos manipud University of the Philippines-Philippine Genome Center (UP-PGC), nakailista dagitoy iti dua a kaso ti KP.2, tallo pulo a kaso ti nailista dagitoy iti kaso ti JN.1 bayat a dua a kaso met iti JN.1.18 ti naireport idi napalabas a bulan.
Dagus met a nangisayangkat ti World Health Organization (WHO) iti monitoring tapno malapdan ti panagraira daytoy.
Kabayatanna, agtultuloy latta ti panagngato ti baro a kaso ti COVID-19, no sadino dumanon daytoyen iti 2,235 a kaso manipud May 21 agingga May 27, iti agdama a tawen.
Gapu iti daytoy, imbilin ni Health Secretary Ted Herbosa iti Bureau of Quarantine (BOQ) tapno mangisayangkat dagitoy iti screening kadagiti entry points partikular kadagiti airports.
