Inruaren iti Bangko Sentral ng Pilipinas ti baro a langa wenno disenyo dagiti polymer banknotes iti pagilian.
Makita ditoy dagiti nagduduma a napapateg a simbolo iti Pilipinas ken daduma pay a pakabigbigan daytoy.
Imprisinta ti nasao a central bank dagiti baro a kita iti 500, 100, ken 50 peso bill ken ni President Ferdinand R. Marcos, Jr. idi laeng kalman.
Immuna metten a nairuar ti baro a langa iti 1000 peso bill idi April 2022 nga addaan iti ladawan iti agila ken ti Tubbataha Reefs Natural Park, South Sea pearl, ken ti T’nalak weave.
Sigun iti BSP, dagiti baro a bersyon dagiti peso bills ket mangitantandudo iti nabaknang a biodiversity ken cultural heritage iti Pilipinas.
Nupay magagaran dagiti kameng iti nasao a bangko a maipaayanen ti publiko iti kaudian a langa iti kwarta, limitado paylaeng ti bilang dagiti naaramid iti agdama.
