BAGUIO CITY – Nadutukan ti maysa a medical doctor kas baro a dadaulo ti Bureau of Fire Protection (BFP) – Cordillera.
Maibasar iti waragawag ti BFP-Cordillera, ni Fire Senior Superintendent Roderick Esteban Ramirez ket maysa a medical doctor a tubo ti probinsia ti Cagayan ken siguden a nagserbi kas Chief EMS ken Medical Officer ti BFP iti Region 1, Region 2, Region 3 ken iti Cordillera.
Kangrunaan a nagserbi daytoy kas doktor dagiti personnel ti BFP kadagiti nasao a rehiyon.
Naudi a nagserbi daytoy kas dadaulo ti Health and Emergency Management Division ti national headquarters ti BFP sakbay ti panakadutokna kas dadaulo ti BFP-Cordillera.
Kabayatanna, ni outgoing BFP-Cordillera regional director Fire Chief Superintendent Sofia Mendoza ket nadutukan kas director ti Fire Safety and Enforcement Division ti national headquarters ti BFP.
