BAGUIO CITY – Guyguyuguyen ti Philippine Embassy sadiay South Korea dagiti overseas Filipino workers (OFWs) sadiay a kayatda ti agala ti employment certificates nga idalanda ti transaksionda babaen iti online wenno e-mail tapnu saanen nga agbiahe dagitoy.
Iti interview ti Bombo Radyo Baguio kenni Bombo International Correspondent Roel Toquero nga OFW sadiay Gimpo, South Korea, kinunana nga agtultuloy ti bayanihan nga ar-aramiden dagiti Filipino communities ken dagiti nagduduma nga ahensia ken opisina ti gobyerno a nakabase sadiay South Korea.
Sigun kenkuana, panggep ti bayanihan a makaurnong iti umdas a suplay ti face masks ken hand sanitizer a maiwaras kadagiti kailyan nga adda kadagiti lugar sadiay South Korea a nakailistaan ti adu a kaso ti COVID-19 kas iti Daegu City.
Innayonna nga agingga ita ket adu paylaeng dagiti OFWs sadiay nga awanan ti trabaho gapu iti temporaryo a panakaisardeng ti operasyon dagiti pagtatrabahuan dagitoy a kompanya gapu iti coronavirus.
Dinakamat pay ni Toquero a mabalin met nga agawid ditoy Pilipinas dagiti apektado nga OFWs sadiay bayat nga ur-urayenda ti panagsubli ti operasyon ti kompanyada.
Nupay kasta, inaklonna met a masayangan dagiti dadduma iti nangina a plete no agawidda ditoy pagilian.
