Nainget nga agmonitor dagiti kameng iti Baguio City Police Office kadagiti kangrunaan a pagserrekan ken pagruaran iti Baguio City bayat ti umadanin nga holiday season.
Iti panakiuman ti Bombo Radyo kenni Baguio City Police Office-City Director PCol Ruel Tagel, dagiti mabantayan a kalsada ket pakairamanan ti Marcos Highway, Naguilian Road, ken dadduma pay.
Imbiglayna a kas kadagiti napalpalabas a panagplano ken panagsagana dagiti kameng iti pulisya, manamnama a mangituding dagitoy iti control points iti siudad tapno makontrol ti gunay ti trapiko.
Malaksid iti dayta, maisagsagana metlaeng dagiti rerouting plans.
Iti sabali a bangir, awan pay ti makitada a rason tapno agkiddaw ti augmentation manipod iti regional office para iti umadanin nga holiday season.
Kumpyansa ni Police Colonel Tagel nga iti agdama ket umdas ti pwersa dagiti kameng iti Baguio City Police Office ken nakasaganan dagitoy para iti nasao nga operasyon.
Iti baet dayta, agtaltalinaed latta ti panangikonsiderada iti panagkiddaw iti tulong manipod iti regional office kaspangarigan kasapulan ti augmentation.
Kabayatanna, kinunana met ni Regional Office-Cordillera Regional Director PBGen David Peredo Jr. a kasapulan a mabantayan ti siudad iti Baguio gapu ta daytoy a lugar ti kadawyan a pagsarsardengan ti adu nga indibidwal a sumarsarungkar iti Rehiyon Cordillera.//Bombo Jez Lapizar
