BAGUIO CITY – Nainget nga agsansanay ita dagiti uppat nga Igorot MMA fighters manipud Team Lakay a lumaban iti ONE: Century a pakaitampokan ti dua a full-scale world championship events sadiay Tokyo, Japan inton October 13.
Agserbi a co-main event iti second card ti fight card ti mapadpadaanan a rematch-da Kevin Belingon ken Bibiano Fernandes para iti bantamweight world championship.
Agsango met da Honorio Banario ken sigud a world champion Shinya Aoki iti undercard iti lightweight division ken ditoy a gandaten ni The Rock a sumubbot iti pangabak kalpasan ti nagsaruno a panaka-abakna.
Kabayatanna, agserbi met a co-main event iti first card ti fight card ti mapadpadaanan a panagsango da Danny Kingad ken Demetrius Johnson.
Ag-debut met ni Lito Adiwang iti ONE Championship babaen iti labanda kenni Senzo Ikeda iti strawweight division.
Iggem ni Adiwang ti impresibo a record ti 9 wins- 2 loss bayat nga addaan ni Ikeda iti record a 12 wins-7 losses.
Agserbi a historic 100th live event ti ONE Championship ti nasao nga torneyo.
