BAGUIO CITY – Balligi ti maysa a Igorot MMA fighter bayat a napaay dagiti tallo kakadwana iti labanda iti ONE: Century a naangay sadiay Tokyo, Japan idi kalman ken idi rabii.
Nagleppas ti rivalry iti nagbaetan da reigning ONE bantamweight world champion Bibiano Fernandes ti Brazil ken Kevin Belingon ti Team Lakay kasaruno ti maikapat a panagsango dagitoy.
Inabak ni Fernandes ni Belingon babaen iti second round rear-naked choke.
Gapu iti daytoy, nabaelan ni Fernandes a naidepensa ti titulona bayat a bimmaba ti professional MMA record ni Belingon iti 20-7.
Indomina met ni sigud a two-time ONE Lightweight World Champion Shinya Aoki ti Japan ti labanda kenni Honorio Banario kalpasan nga inabakna ti Team Lakay fighter babaen iti d’arce choke.
Nag-tap out ni Banario kalpasan laeng ti 54 seconds iti umuna a rikos ti labanda kenni Aoki.
Naabak metlaeng ni Danny Kingad ti Team Lakay babaen iti unanimous decision iti panagsangoda kenni sigud nga UFC flyweight world champion Demetrious Johnson iti ONE Flyweight World Grand Prix Championship.
Nagbalin nga agresibo ni Kingad iti umuna a paset ti labanda kenni Johnson ngem saan nga immanay daytoy tapnu maabakna ti sigud a kampeon.
Kabayatanna, nagballigi met iti debut-na iti ONE Championship ni Team Lakay strawweight prospect Lito Adiwang kalpasan nga inabakna ni Senzo Ikeda ti Japan.
Inabak ni Adiwang ni Ikeda babaen iti first-round technical submission.
Napasayaat ti professional MMA record ni Adiwang iti 10-2.
