Agsagsaganan ti Benguet para iti naituding a panangsangaili daytoy iti 2026 Cordillera Administrative Region Athletic Association (CARAA) Meet.
Sigun kenni Cesar Luma-ang, ti provincial sports coordinator iti Department of Education-Benguet,maysa a nakitada a karit iti naglabas a panangsangailida iti nasao a regional sports competition ket dagiti adayo a billeting areas.
Inaklon ni Luma-ang a kadawyan a pakaseknan idi 2025 dagiti delegasyon ti maipapan iti trapiko.
Gapu iti dayta, kitkitaen dagiti maseknan nu kasano a mapasayaat ti maipapan kadagiti billeting areas iti 2026 CARAA Meet.
Maipalagip nga iti naglabas nga edisyon iti nasao a pasalip ket naangay manipod February 23 agingga February 28, 2025 a nakipasetan dagiti nasurok lima ribo nga atleta.
Nagkampeon iti daytoy ti delegasyon iti Baguio City, first runner up wenno maikadua met ti delegasyon iti Benguet, second runner up ti Apayao,third runner up ti Ifugao, fourth runner up ti Abra,fifth runner up ti Mountain Province, sinaruno ti delegasyon iti Tabuk City bayat a naala met ti Kalinga ti maudi a pwesto.//Bombo Rob Dominguez
