BAGUIO CITY- Sumangsango ita iti kaso a panaglabsing iti RA 9165 wenno ti Comprehensive Dangerous Drugs Act of 2002 ti maysa a high-value drug personality kalpasan a naiserbi ti warrant of arrest iti pagtaenganna sadiay East Quirino Hill, Baguio City idi kalman.
Nabigbig daytoy a ni Christopher Sad-ang Ampal, 40-anyos ken residente iti nasao a lugar.
Maibasar iti report, nangipatungpal iti search warrant ti nagtipon a pwersa ti BCPO, PDEA ken Regional Intelligence Unit 14 iti pagtaengan ni Ampal.
Kabayatan ti operasyon, nakumpiskar manipud iti suspek ti maysa a plastic sachet a naglaon ti maatap a shabu nga agdagsen iti 0.52 a gramo ken aggatad iti P3,536.
Naala metlaeng manipud kenni Ampal ti maysa a transparent cellophane a naglaon ti maatap a shabu nga agdagsen iti nasurok kumurang 98.01 a gramo ken aggatad iti P666,468.
Naiturong ti suspek ken dagiti nakumpiskar nga ebidensiya iti kustodiya ti PDEA-Benguet para iti umno a dokumentasyon ken disposisyon.
