Nanayunan pay dagiti nagreklamo a maipagarup a biktima ni Kingdom of Jesus Christ (KOJC) leader Apollo Quiboloy, kalpasan a nangkamangda iti Philippine National Police bayat ti operasion ti panakaiserbi ti warrant of arrest daytoy iti unneg ti Kingdom of Jesus Christ Compound sadiay Davao City.
Sigun kenni Philippine National Police Spokesperson Police Colonel Jean Fajardo, kinuna dagiti mapapati a biktima a naabuso dagitoy.
Gapu iti dayta, manarimaan ti panakikoordinar ti Philippine National Police iti Department of Social Welfare and Development (DSWD), agsipudta sumagmamano kadagiti biktima ti menor de edad.
Kabayatanna, kinuna ni Philippine National Police chief Police General Rommel Marbil a nangipaay dagiti maipagarup a biktima iti impormasion maipapan iti systematic abuse of young women iti sidong ti impluensia ni Quiboloy.
Iti agdama, manarimaan ti proseso dagiti dokumento kalpasan a naala dagiti impormasion kadagiti maipagarup a biktima a saan nga naipablaak ti pakabigbiggan dagitoy.
Iti sabali a bangir, manarimaan ti panakabiruk ti Philippine National Police kadagiti dadduma pay nga impormer a maikari nga ag-claim iti P14-milion a gunggona gapu iti panangtedda iti impormasion a nangitunda iti pannakaarestar da Quiboloy ken dagiti uppat a kakaduana nga akusado.
