BAGUIO CITY – Dumanonen iti 1,535 nga household ti napagturpos ti RA 11310 wenno ti Pantawid Pamilyang Pilipino Program (4Ps) Act iti Cordillera sipod naipatungpal ti programa.
Iti interview ti Bombo Radyo Baguio kenni Fatima Florendo, Regional Program Coordinator ti 4P’s iti Cordillera, kinunana nga buklen dagitoy dagiti benipisaryo nga awanan iti 0-18 yrs old nga miembro ti household dagitoy.
Kinunana a nailanad iti nasao nga linteg a 7 a tawen laeng ti panagtalinaed dagiti household a benipisaryo iti nasao nga programa.
Nasukatan metten ti nasurok 6-K nga household a nagturpos iti programa ngem awan pay ti kanayunan nga expansion iti pakabuklan a target a nailatang iti rehiyon.
Iti agdama ket dumanon iti 59,010 ti pakabuklan a rehistrado nga household wenno benipisaryo iti intero a rehiyon Cordillera.
Nailista ti Abra ti 12,152 a kangatoan a bilang ti benipisaryo sarunuen ti 10,752 iti Benguet; 10,711 iti Kalinga; 9,524 iti Ifugao; 7,220 iti Apayao ken kababaan ti benipisaryo ti Baguio City iti 3,010.
