Sumangsango ita ti maysa a lalaki nga agtawen iti 32, maysa nga Street Level Individual iti kaso a pananglabsing iti Republic Act (RA) No. 9165 wenno Comprehensive Dangerous Drugs Act of 2002 ken RA No. 10591 wenno Comprehensive Firearms and Ammunition Regulation Act kalpasan a naarestar daytoy iti maysa a buy-bust operation idiay Barangay Gumhang, Tinoc, Ifugao idi kalman, Setyembre 18.
Naarestar daytoy kalpasan a nangilako iti tallo a sachet ti maatap a shabu nga addaan iti Standard Drug Price (SDP) a PhP6,800.00 iti operatiba a nagserbi kas poseur-buyer.
Nakumpiska metlaeng manipud kenkuana ti kanayunan a sachet ti maatap a shabu nga aggatad iti P204.00.
Malaksid iti droga, narekober metlaeng manipud iti suspek ti maysa a .45 caliber Taurus Pistol a kargado iti pito a bala kasta metlaeng dagiti dadduma pay a drug paraphernalia.
Naipatungpal ti operasyon babaen iti panagtinnulong dagiti operatiba manipud iti Provincial Drug Enforcement Unit ken Provincial Intelligence Unit ti Ifugao Police Provincial Office, Tinoc Municipal Police Station, ken 1st Ifugao Provincial Mobile Force Company.//
