BAGUIO CITY – Nainget a bambantayan ita ti Regional Epidemiology and Surveillance Unit (RESU) ti Department of Health (DOH) – Cordillera ti 26 a sakit.
Sigun kenni Nurse V Geenie Anne Austria, dadaulo ti nasao nga DOH-CAR RESU, manipud iti nasao a bilang ket 11 a sakit ti nailistada iti rehiyon idi napalabas a bulan ken karaman kadagitoy a sakit ti dengue, hand foot and mouth disease, leptospirosis, thyphoid ken dadduma pay.
Nupay kasta, pagyamyamananna gaputa bimmaba ti bilang dagiti kaso a nailista kadagiti nasao a sakit no idilig iti Enero idi 2020.
Iti baet daytoy, imbinglayna a ngimmato met ti nailistada a kaso ti acute diarrhea sadiay Ifugao ken Apayao bayat a ngimmato met ti nailistada a kaso ti leptospirosis sadiay Kalinga ken Mountain Province.
Gapu iti daytoy, kinuna ni Austria nga irtengadna ti community surveillance iti nagduduma a paset ti rehion kadagiti nasao a sakit, malaksid laeng iti COVID-19.
Inyapelana metlaeng ti dagus a panagpakonsulta iti doktor wenno kadagiti klinika dagiti makapaspasar ti aniaman a sintomas ti sakit tapnu saan a mabaybay-an ti kondisyon dagitoy.
