![](https://img.bomboradyo.com/baguio/2019/04/kabayan.jpg)
BAGUIO CITY – Agkurkurang ti bilang dagiti lugan nga agbibiyahe sadiay Kabayan, Benguet a mang-akomodar kadagiti turista nga agturturong iti nalatak a Mt. Pulag.
Sigun kenni Mt. Pulag National Park Superitendent Emerita Albas, bassit ti simmangbay a turista iti napalabas a Holy Week iti baet a napumpunno ti reservations dagitoy.
Kinunana a kangrunaan a parikotda ti tranportasyon nga agturong sadiay gapu iti kinakurang dagiti parpasahero a van ken dadduma a lokal a transportasyon.
Inaklonna nga adda dagiti agbibiyahe a pribado a van a mangak-akomodar kadagiti turista ngem mabuteng dagitoy a matiliw nangruna nu nainget ti panagsukimat dagiti kameng ti DOTr ken LTO kadagiti espesial nga okasyon.
Inlawlawagna nga addan ti resolusyon ti lokal a gobierno ti Kabayan para iti panakailukat ti kanayunan a prangkisa kadagiti parapubliko a lugan.
Mangnamnamada a makapagproseso iti prangkisa dagiti vanstapnu manayunan ti legal nga agbiyahe sadiay Kabayan nangruna iti umad-ado a bilang dagiti turista nga agtarigagay a sumang-at iti Mt. Pulag.