BAGUIO CITY – Bassit paylaeng dagiti maladaga ditoy rehion Cordillera a nabakunaan kontra iti polio ken measles-rubella.
Sigun kenni Department of Health (DOH) – Cordillera Immunization Program Coordinator Joyce Rillorta, saan pay a nagun-od ti 95% manipud iti puntiryada a bilang dagiti ubbing iti rehion a mabakunaan manipud nangrugi ti nationwide Measles Rubella – Oral Polio Vaccine Supplemental Immunization iti pagilian idi napalabas a Pebrero.
Kinunana a gapu iti daytoy ket agtultuloy latta ti kampanya ken panangiyapelada iti panangipabakuna dagiti nagannak kadagiti maladaga nga annak dagitoy.
Dinakamatna met a maysa a rason iti nababa a bilang dagiti nangipabakuna iti ubbingda ket ti limitado a panaggaraw dagiti tattao gapu kadagiti paglintegan kontra iti agdama a pandemya.
Innayonna a maysa pay a rason ti panag-amak dagiti nagannak a mangiturong kadagiti annakda iti pagpabakunaan gapu iti COVID-19.
Sigun pay kenni Rillorta, ikagkagumaanda a mangituloy iti routine immunization program tapno magun-od ti puntirya dagitoy a bilang dagiti ubbing iti rehion a mabakunaan kontra iti polio ken measles-rubella.
