BAGUIO CITY- Dumanonen iti 3,701 nga indibidual ti natiliw gapu iti panaglabsingda kadagiti paglintegan ti Land Transportation Office iti Cordillera iti umuna a kwarter ti agdama a tawen.
Sigun kenni Francis Ray Almora, dadaulo ti nasao nga ahensia, nailista ti Baguio City ti kangatoan a bilang dagiti naglabsing a dumanon iti 2,244; sarunoen ti Mt. Province nga 571; Apayao nga 341; Kalinga nga 255; Abra nga 132; Benguet nga 88 ken Ifugao nga 70.
Karaman kadagiti kangrunaan a nilabsing dagiti violators ti saan a panagaramat ti seatbelt, awanan ti official receipt ken certificate of registration; reckless driving; awanan ti permit wenno lisensia nga agbiahe ken daduma pay.
Gapu iti dayta, kinuna ni Almora a kurang ti disiplina dagiti motorista isut gapuna nga ikalikagumda ti panagpaisidong dagiti driver iti comprehensive drivers education sakbayda a maipaayan ti lisensia.
