BAGUIO CITY – Bimmaba ti bilang dagiti indibidual a nagparehistro iti probinsiya ti Benguet para iti masungad a national and local elections gapu iti epekto ti COVID-19 pandemic.
Sigun kenni Benguet Provincial Election Supervisor Atty. Elenita Julia Tabangin-Capuyan, nasurok laeng iti 2,000 ti nagparehistro kadagiti municipal offices ti COMELEC nga adayo a nababa no idilig iti 11,000 agingga 17,000 nga a naiparehistro dagitoy kadagiti napalpalabas a tawen.
Inlawlawagna a ti nababa a bilang dagiti nagparehistro idi napalabas a tawen ket epekto ti pandemya a nagresulta iti limitado a panaggaraw dagiti tattao, pakairamanan ti panagturong kadagiti opisina ti COMELEC.
Dinakamatna a maysa ti Benguet kadagiti nakailista ti kababaan a bilang ti registrants.
Innaklonna met a marigatanda a mangisayangkat ti offsite voter’s registration ken dagiti dadduma nga aktibidad ti komisyon gapu kadagiti pagalagadan a dagiti laeng lugar nga awanan kaso ti COVID-19 manipud iti napalabas a 14 nga aldaw ti mabalin a pagturongan dagitoy.
Kabayatana, al-allukoyen ni Atty. Capuyan dagiti umili ti Benguet nga agturong dagitoy kadagiti opisina ti COMELEC iti bukodda a munisipyo tapno agparehistro bayat a saan pay a nagleppas ti registration period para iti masungad a basingkawel.
