BAGUIO CITY – Manamnama a manayunan dagiti parke ditoy Baguio City a maipasidong iti rehabilitation
Kasaruno daytoy iti pannakaileppas ti rehabilitasyon ti Botanical Garden a nailukat iti publiko idi Marso 6 kagiddan iti panaglukat ti selebrasyon ti Panagbenga Festival.
Iti interview ti Bombo Radyo Baguio ken City Tourism Officer Engr. Alec Mapalo,kinunana a manamnama a maipangruna iti pannakarehab ti Post Office Garden.
Imbinsana a posible met a maituloy ti rehabilitasyon ti Burnham Park a naituding a marugyan kuma sakbay iti pandemya wenno tawen 2019 kasaruno iti panangipaay ti PEZA iti pondo ngem nare-align ti nasao a pondo rason iti temporaryo a saan a pannakaipatungpal ti proyekto.
Nupay kasta, kinunana a nagkari ti PEZA a mangilatangda ti pondo para iti daytoy ken dadduma a proyekto ti syudad kadagiti sumaruno a budget allocation dagitoy.
Innayunna a maisaruno a main-inot a marehabilitate ti Wright Park a masarakan sadiay Gibraltar pakairamanan ti pool of pines iti sangwanan ti The Mansion.
Inlawlawagna a posible a mabIayagan daytoy gapu ta nalawa ti sakop ti nasao a parke ngem kumpyansa ni Mapalo iti napartak a pannakaileppas daytoy agsipod ta adda ti suporta a maaw- awat ti syudad manipod kadagiti nagduduma nga ahensya ti Gobierno para iti pannakapadur as dagiti parke ti Baguio City a makaawis kadagiti local ken ganganaet a turista.
