BAGUIO CITY – Dumanonen iti 17 a tattao ti pimmusay gapu iti dengue fever iti rehiyon Cordillera manipud January agingga ita a bulan ti September.
Sigun kenni Karen Lonogan, senior health program officer ti Department of Health – Cordillera, nakailista ti rehiyon iti pakabuklan a 6,203 a kaso ti dengue ita a tawen, nangatngato iti 16% no idilig iti bilang ti kaso ti dengue a nailista iti kapada a panawen idi napalabas a tawen.
Kinunana a nailista ti Kalinga ti kangatuan a kaso ti dengue a sinaruno ti Benguet, Apayao, Abra, non-Cordillera areas, Mountain Province, Baguio City ken Ifugao.
Innayonna nga innem ti pimmusay sadiay Benguet, lima iti Baguio City, tallo iti non-Cordillera areas, dua sadiay Mountain Province ken maysa sadiay Kalinga.
Pinagyamananna met ti panagbalin nga aktibo dagiti lokal a gobyerno iti rehion seknan iti panakakontrol ken panakaprebentar ti dengue.
Dinakamatna a nabiag manen ti anti-dengue task force kadagiti babbarangay tapnu tumulong iti panakakissay dagiti kaso ti dengue.
Naobserbaranda pay a kaaduan kadagiti nakaptan ti dengue ket adda iti age group a 20-anyos.
