Dumanonen iti 65 ti bilang dagiti pimmusay gapu iti 7.8 magnitude a gingined a napasamak idiay Mindanao idi Hunyo 8.
Iti kaudian a report ti National Disaster Risk Reduction and Management Council (NDRRMC) ita nga aldaw, dumanonen iti 176,186 a pamilya a buklen ti 736,386 nga indibidual ti apektado gapu iti napasamak.
Innayon pay ti nasao nga ahensya a dumanonen iti 1,447 nga indibidual dagiti nadangran manipud iti napasamak a gingined ken dumanonen iti 36 dagiti bilang ti mapukpukaw. Nupay kasta, maberipikar pay laeng ti nasao a bilang.
Kabayatanna, 39 a siudad ken lugar ti agtultuloy a makapaspasar iti power interruption bayat nga awan pay laeng ti suplay ti danum iti agarup 16 a lokalidad.
Naipasidung metten iti state of calamity ti agarup 14 a siudad ken munisipalidad sadiay.
Iti baet dayta, agtultuloy dagiti maipatpatungpala relief ken response operation ti gobyerno ken dumanon metten iti P137 milyon a gatad ti tulong ti naipaay kadagiti apektado a komunidad. //bombokaren.c.sapirao
