BAGUIO CITY- Manaynayunan ti bilang dagiti turista nga agturturong kadagiti tourist spots sadiay Atok, Benguet kalpasan a naglukat ti turismo dagitoy ita nga bulan.
Iti interview ti Bombo Radyo Baguio kenni Edward Haight, Chairman ti Tourism Council ti Atok, kinunana nga dumandanon iti 150 agingga 350 ti bilang dagiti turista a mapaspasangbayda tunggal aldaw.
Posible pay a dumandanon iti 400 agingga 500 ti mapaspasangbayda kadagiti nalalatak nga tourist spots sadiay nangruna kadagiti flower gardens kabayatan ti weekends wenno holidays.
Sigun kenkuana, nupay adda dagiti restrictions iti panaglukat ti turismo, in-inot metten nga agsubsubli ti siglat ti turismo sadiay ken manamnama pay a manayunan ti bilang dagiti turista apaman nga aglukat dagiti dadduma nga tourist spots.
Agpalpalagip met daytoy kadagiti turista iti panagturongda pay nga umuna iti Information Center ti lokal a munisipyo nga agserserbi kas triage sakbayda nga agturong kadagiti tourist destination.
Kabayatanna, mangnamnama met daytoy a maadal ti munisipyo ti pannakaimaton iti iseserrek dagiti turista tunggal weekends gaputa mairekrekkep ti information center a pagbayadan koma iti environment fee.
Sigun kenkuana adu dagiti saan a makolkolektar nga environment fee tunggal Sabado ken Domingo gaputa nakarikkep ti munisipyo isunga bassit ti maal-ala dagitoy a mangtulong koma iti panakamintinir ti operasyon dagiti tourism sites sadiay Atok.
