Bimmaba ti bilang dagiti nailista nga uram iti Cordillera Administrative Region iti napalabas a dua a tawen, sigun iti Bureau of Fire Protection Cordillera.
Imbinglay ni Bureau of Fire Protection Cordillera Chief Public Information Officer Captain Melchor Medes a nu pay makita daytoy nga indikasyon a mas adadon ti ammo dagiti tattao maipanggep iti fire prevention, saan daytoy a garantiya nga awanen ti mapasamak nga uram iti masangoanan.
Innayon pay ni Captain Medes a kaadoan kadagiti rason iti uram a nailistada ket gapu iti kinaliway iti tao.
Mainaig iti dayta, gapu iti nabara a panawen wenno sobra a kinalam-ek, mapilpilitan dagiti tattao a mangusar iti nabaybayag ken adado nga appliances nga isu met ti pagtataudan dagiti uram nu mabaybayan a nakasindi iti nabayag, wenno nu maisaksak iti octopus wirings.
Mainaig met iti wildfires, mailaksid kadagiti natural a rason, sumagmamano kadagitoy ket gapu iti panagpuor kadagiti basura ken saan nga umno a panagibelleng iti sigarilyo kadagiti bantay.
Gapu iti dayta, kiniddaw ni Medes ti publiko a sakbay a pumanaw, maikkat umuna dagiti nakasaksak nga alikamen ken nu posible ket mai-switch off ti main power breaker tapno makaliklik ti uram.
Impalagip pay iti Bureau of Fire Protection a maipawil ti panagpuor iti basura wenno aniaman a kagawaan iti aniaman a lugar ken aniaman nga oras.
