CORDILLERA- Ngimmato ti bilang dagiti Vape user iti Rehion Cordillera sigun iti Smoke Free- Transcending Institutions and communities Inc.
Sigun kenni Cecille Agpawa, Program Manager ti Smoke Free- Transcending Institutions and communities Inc. iti baet a bimmaba ti bilang dagiti natataengan nga agsigsigarilyo, naobserbaranda ti napartak a panagngato ti bilang dagiti vape users nga agtawtawen ti 13 agingga 15.
Imbinglay ni Agpawa nga iti entero a pagilyan, dumanon iti 8 million dagiti matmatay gapu iti panagsigarilyo.
Mainaig iti dayta, impeksa ni Agpawa a ti nagduduma a flavors ti maysa a rason ti panagadu dagiti teenagers nga agar-aramat iti vape.
Impeksa ti nasao nga opisial nga iti agdama, agarup 15,000 dagiti flavors ti vape a nabukel.
Malaksid iti manipulative marketing a makaawis kadagiti agtutubo, maibilbilang pay a rason ti false information a nataltalged ti vape no idilig iti sigarilyo.
Kabayatanna, nailista dagitoy ti baro a sakit nga Evali gapu iti panagaramat iti vape.
Imbinglay ni Agpawa, nga agtawtawen iti sangapulo ket innem ti kaunaan a kaso a nailistada bayat a dagiti pimmusay ket agtawen iti 24 ken 25.
Gapu iti dayta, agtultultuloy ti information dissemination dagiti maseknan nga indibidual para kadagiti agtutubo nangruna ita a mangrugi manen ti klase.//Bombo Noveh Organo
