Inlawlawag ti Bureau of Internal Revenue (BIR) a ti panaglako ken panagusar kadagiti peke a PWD (persons with disability ) ID ket tax evasion.
Sigun kenni Bureau of Internal Revenue (BIR) Commissioner Romeo Lumagui Jr., saan laeng a tax evasion nu diket saanda pay a raraemen dagiti lehitimo ken pudno a persons with disability.
Iti sidong ti Republic Act No. 7277, kas naamyendaran ti Republic Act No. 10754, dagiti persons with disability ket makaawat ti 20 percent discount ken mailaksidda manipod iti value-added tax (VAT) kadagiti sumagmamano a tagilako ken serbisio babaen ti panangidatag iti PWD card.
Nupay kasta, kinuna ti BIR a dagiti awan prinsipiona a tattao ket aglaklakoda kadagiti peke a PWD ID iti online ken iti kalsada, isut rason a dagitoy ket makagungun-od ti nasao a benepisio.
Sigun kenni Senador Sherwin Gatchalian, dumanon gamin iti P88.2 billion a buis ti napukaw gapu iti peke nga identification cards dagiti PWD.
Impasigurado ti nasao nga ahensia nga agtultuloy ti panangisayangkatda iti tax audit kadagiti adda pakainaigan dagiti PWD nga impadamag dagiti nagduduma nga establisimiento.
Makikoordinar pay ti Bureau of Internal Revenue (BIR) iti Department of Health ken ti National Council on Disability Affairs tapno maberipikar ti kinalehitimo dagiti ID ti Persons With Disability.
