Impakaammo ni Cordillera Regional Election Director Atty. Julius Torres, nga iti umuna a gundway iti eleksyon iti pagilian, maaddaan iti early voting para kadagiti indibidwal a karaman iti vulnerable sector pakairamanan dagiti senior citizen, Persons with Disability ken dagiti heavily pregnant.
Panggep ti nasao nga addang nga ipangruna dagiti karaman iti nadakamat a sector tapno saandan a marigatan iti bayat ti panagbobotos.
Ti early voting ket maipatungpal mangrugi iti alas singko iti parbangon agingga alas siete iti agsapa iti aldaw ti eleksyon.
Kaspangarigan saan a makaturong dagiti karaman iti vulnerable sector iti naikeddeng nga oras ti early voting, mabalinda latta ti agbotos iti regular nga oras ti panagbotos nga 7:00AM agingga 3:00PM nu sadino maipanamnama metlaeng ti panakaipangruna dagitoy.
Iti sabali a bangir, maipatungpal metlaeng ti Emergency Accessible Polling Places (EAPP) a programa iti Commission on Elections nu sadino, agserbi daytoy kas lugar a mabalin a pagturungan dagiti karaman iti vulnerable sector seknan iti panagbotos dagitoy.
Ti nadakamat a polling place ket maysa a lugar a nalaka a maakses dagiti adda iti vulnerable sector gapu ta saanen a kasapulan dagitoy ti umuli wenno agturong kadagiti voting precinctda.//Bombo Jez Lapizar
