Konkondenaren dagiti indigenous people wenno nainsigudan nga umili idiay La Trinidad, Benguet ti brutal a wagas a panagparti iti taraken nga aso
Sigun kenni Richard Wacnisen, Indigenous People’s Mandatory Representative ti La Trinidad, nasken a sagrado wenno nasantuan ti wagas iti panagparti iti aso a maaramat iti ritual a daw-es.
Anya ti daw-es?
Kinuna ni Wacnisen a dakkel ti pammati dagiti Indigenous People leaders a nu maipatungpal ti ritual a daw-es, ket maliklikan ti dakkes a mapasamak iti maysa nga indibidual wenno kadagiti umili iti maysa a lugar.
Nupay kasta, inyunay-unayna a saanda a nakaugalian ti panangparigat kadagiti aso sakbayda a partien kas atang.
Immunan nga impetteng ni Dr. Purita Lesing, dadaulo ti Provincial Veterinary Office – Benguet, a parikut ti opisinada ti brutal a panagparti dagiti sumagmamano nga indibidual kadagiti taraken nga aso nu mangipatungpalda ti ritwal.
Gapu iti daytoy, adu dagiti naidarum nga indibidual gapu iti panaglabsingda iti Animal Welfare Act.
Nakalanad iti nasao a linteg a maiparit ti panagparti ken panagilako ti karne ti aso malaksid laeng nu ritwal ti pakaaramatan daytoy.//Bombo Genzel
