BAGUIO CITY – Naibaluden ti suspek a brutal a nangpapatay iti maysa a lalaki a nasarakan a napungsayan ti ulo iti kalsada sadiay Pagturao, Bontoc Ili, Bontoc, Mountain Province idi Martes, Abril 9, 2019.
Nabigbig ti suspek a ni Kevin Ongaron Changat, 25-anyos, butcher, tubo ken residente ti Pattig, Bontoc Ili, Bontoc, Mt, Province bayat a nabigbig ti biktima a ni Wilfred Aquino, 31-anyos, butcher ken tubo ti Masoc, Bayombong, Nueva Viscaya.
Maibasar iti report ti Cordillera PNP, nag-inom ti biktima, ti suspek ken maysa pay a lalaki ngem pimmanaw ti nasao a kadwada.
Nupay kasta, iti kabigatanna ket nakita laengen ti maysa nga umili ti bagi ti biktima a nakadasay iti kalsada ken iti panagresponde dagiti pulis ket nadanunanda ti awanan ulo a bagi ti biktima nga addaan nakatudok a kutsilyo iti barukongna malaksid pay iti adu a tagbat iti barukong ken tiyanna.
Nasarakan ti ulo daytoy kabayatan ti panakaiproseso ti crime scene.
Nakemmeg dagiti dua a nakainoman ti biktima ngem ti suspek a ni Changat ti nakasuan gapu kadagiti nakita a dara iti ima ken saka daytoy.
