Napanaganan ni Filipino gymnast Carlos Yulo kas 2024 Athlete of the Year babaen ti Philippine Sportswriters Association para iti performance ken pannakagun-odna ti balitok a medalya iti 2024 Paris Olympics.
Ni Yulo ti napili iti nasao a pammadayaw gapu iti panangiyawidna ti dua a balitok a medalya para iti Pilipinas kalpasan nga impakitana ti kinalaingna iti floor exercise ken vault apparatus events iti gymnastics.
Isuna ti nagbalin a maikadua nga Olympic gold medalist manipod Pilipinas kasaruno ti pannangabak ni weightlifter Hidilyn Diaz iti 2021 edition ti Summer Games idiay Tokyo.
Idi metlaeng 2024, nangabak ni Yulo iti balitok a medalya para iti individual all-around, floor exercise, vault, ken parallel bars events iti Championships idiay Tashkent, Uzbekistan.
Ti gymnast manipod Manila ket kaunaan a gymnast a naipaayan ti pammabigbig nga Athlete of the Year kasaruno ni Pia Adelle Reyes idi 1997.
Mabigbig daytoy inton Enero baente siete iti tinnawen a Philippine Sportswriters Association awards night.
Malaksid iti Athlete of the Year, ipaay metlaeng ti Sportswriters Association ti award a kas ti NSA of the Year, Presidentโs Award, Executive of the Year, citations, Tony Siddayao Awards, ken Hall of Fame and Special Recognition to Filipino athletes, ken para athletes a nakiay-ayam iti 2024 Paris Olympics ken Paralympics.
