LA TRINIDAD, BENGUET – Saan paylaeng a maakomodar ti Munisipyo ti La Trinidad dagiti basura manipud kadagiti kabangibang a munisipyo wenno siyudad partikular ti siyudad ti Baguio apaman nga agleppas ti pannakatarimaan ti Cell 2 ti landfill iti nasao a munisipyo.
Iti panakiuman ti Bombo Radyo kenni Arthur Pedro, ti Administrative Officer V iti La Trinidad Municipal Environment and Natural Resources Office, kinunana a limitado paylaeng ti nasao nga espasyo ti landfill.
Gapu iti dayta, umdas laeng daytoy a mang-akomodar kadagiti basura dagiti residente iti La Trinidad.
Kabayatanna, manamnama a malpas ti construction ti Cell 2 ti landfill sadiay Brgy. Alno, La Trinidad kalpasan ti dua agingga tallo a bulan.
Iti agdama ket maiturturong dagiti basura wenno residual nga agtataud iti nasao a munisipyo sadiay Urdaneta, Pangasinan.
Iti sabali a bangir, maipalagip nga idi naipatungpal ti City Hall Hour iti siyudad ti Baguio ket inyebkas ni Margie Della, ti City General Services Assistant Head nga awan pay ti nangiyebkas a kabangibang daytoy a munisipyo a mabalin a pangiturungan iti siyudad ti Baguio kadagiti basura dagitoy.
