BAGUIO CITY – Napabettakan iti granada ti cell site ti maysa a telecommunications company a masarakan sadiay Washington Street, Zone 2, Bangued, Abra iti parbangon idi kalman.
Maibasar iti inisyal nga impormasyo a naala ti Bombo Radyo, agparpartrolya ti security guard a ni Jerald Belarez idi makangngeg ti napigsa a panagbettak, sumagmamano a metro manipud iti lokasyonna.
Binirukna ti nagtaudan ti panagbettak ken sadiay a nakitana a naabotan ti sumagmamano a paset ti radio/control room ti nasao a cell site gapu kadagiti shrapnel ti mapapati a granada.
Dagus a naiyuman ti insidente kadagiti pulis ti Bangued, Abra ken iti panagresponde dagitoy ket nakita iti lugar ti lima a metallic fragments ken maysa a safety lever a mapapati a paset ti fragmentation hand grenade.
Im-imbestigaran metten dagiti otoridad no asino ti utek iti nasao nga insidente.
Nupay kasta, kinuna ti supervisor ti nasao a telcom cell site a saan nga apektado ti operasyonda gapu iti napasamak a panagpabettak. (BRVigan)
