BAGUIO CITY – Nakemmeg iti entrapment operation ti maysa a police lieutenant colonel ditoy siudad ti Baguio gapu iti maatap nga extortion wenno panagkikil daytoy.
Nabigbig ti nakemmeg a pulis a ni Police Lt. Col. Allan Domaneo Docyogen, chief ti intelligence unit ti Baguio City Police Office (BCPO).
Sakbay iti pannakammegna ket nakaawat ti BCPO iti reklamo gapu iti maatap a panagkikil ni Docyogen iti maysa a nakemmeg a lalaki gapu iti kaso daytoy a panagtakaw.
Maibasar iti report ti BCPO, nagkikil ni Docyogen iti P200,000 iti nasao a lalaki.
Photo credit to the owner
Sigun iti BCPO, kinuna ni Docyogen a masapul nga agbayad kenkuana ti lalaki tapno saanna daytoy a kemmegen manen.
Naduktalan pay a maatap a pinangtaan ni Docyogen ti lalaki a papatayenna daytoy.
Maibasar iti report, idi April 12 ket nagited ti lalaki iti P47,000 ken ni Docyogen kas pauna a bayad iti kidkiddawen ti nasao a pulis ken itay alas dos ti malem ket alaen koma ni Docyogen ti kanayonan a P50,000.
Nupay kasta, ditoy a nakemmeg ni Docyogen babaen kadagiti kakadwana a pulis iti BCPO.
Maisagsaganan ti kaso a maipila kontra ken ni Police Lt. Col. Allan Domaneo Docyogen.
