BAGUIO CITY – Natalged latta dagiti intsik nga agtatrabaho iti Chico River Pump Irrigation Project sadiay Pinukpuk, Kalinga manipud iti pangta ti Corona Virus Disease-2019 wenno COVID-19.
Sigun kenni Kalinga Provincial Health Officer Dr. Ignacio Cawas, personal a sinarungkaranna dagiti nasao a trabahador tapnu kitaen ken sukimatenna ti kasasaad dagitoy.
Maipalagip a dagiti nasao nga intsik ket empleyado ti China CAMC Engineering Company Limited a kontraktor ti P4.3-B Chico River Pump Irrigation Project.
Inlawlawag ni Dr. Cawas nga addan ti pre-cautionary measures nga inaramid dagiti nasao a gangannaet ken awan ti simrek wenno nagturong sadiay a nagtaud sadiay China iti napalabas nga uppat a bulan.
Innayonna a nadoble ti seguridad iti uneg ti kampo dagitoy ken addaan dagitoy iti ‘no entry area’.
Sigun pay kenkuana, makasiguradoda a no adda man ti sumrek iti ayan ti patrabaho ket maipasidong dagitoy iti sumagmamano nga screening manipud kadagiti eropuerto ken sangladan.
Naamuan nga iti agdama ket adda ti pammilin para iti screening ken monitoring kadagiti entry points sadiay Kalinga, pakairamanan iti paturong iti Tabuk City, Talaca, Tinglayan, Pinukpuk ken Balbalan.
Dinakamat pay ti doktor nga awan ti rumbeng a pagdanagan dagiti umili sadiay la ketdi patibkerenda ti immune system dagitoy ken kanayonenda ti agaramat iti sanitizer.
