Nakasaganan dagiti kameng ti pulisia a mangtiliw kadagiti suspek iti kaso a “missing sabungeros” no kiddawen ti korte, sigun kenni Police Criminal Investigation and Detection Group Director Major General Nicholas Torre.
Kinanselar ti Court of Appeals ti piansa dagiti innem nga indibidual a sumangsango iti “trial” para iti kidnapping ken serious illegal detention iti Manila Regional Trial Court Branch 40.
Nupay kasta, inkalintegan ni presiding Judge Rebecca Guillen-Ubaña iti takderna ket inlibakna ti mosion para iti pannakakanselar ti “bond” ken pannakaipaulog ti warrant of arrest.
Sigun kenni Torre, ammuda nu sadinno dagiti suspek, ken patienna nga aglimmeng dagitoy, ngem mangnamnama a sumukoda ken sanguenda iti korte dagiti kaso dagitoy.
Iti agdama, agtultuloy latta ti imbestigasion seknan iti “missing sabungeros” gaputa saan pay a nagleppas ti kaso dagitoy.
