BAGUIO CITY – Dakkel ti posibilidad nga agkurri ditoy Baguio City ti mail-in voting wenno vote-by-mail a kas iti maysa a wagas ti panagbotos sadiay Estado Unidos ti Amerika.
Iti panakiyuman ti Bombo Radyo Baguio, kinuna ni City Election Officer Atty. John Paul Martin a daytoy ket gapu iti napintas a postal service ken kinatalged dagiti maiwaras nga official ballots nangruna ta aga-ammo ken aga-asideg dagiti tattao.
Inlawlawagna a napintas a singasing ti panakaisayangkat ti mail-in voting ditoy pagilian ita nga adda ti pandemya tapnu maliklikan ti panagu-urnong kadagiti pagbotosan ken maliklikan ti panagwaras ti COVID-19.
Nupay kasta, impettengna a nasken nga adda ti mabukel nga election law para iti nasao a wagas ti panagbotos ken adda ti maaramid a protocol tapnu maipasigurado ti kinapudno ken kinatalged ti balota ken ti botos.
Dinakamatna a napintas ti singasing ngem kasapulan laeng ti naan-anay a plano ken konsiderasyon kas iti logistics, legal principle, timeliness, promptness ken ballot security tapnu maipanamnama nga awan ti tumaod a parikut.
