Inlawlawag ni Daryll Kim Longid, Deputy Chief iti Public Order and Safety Division iti Baguio City a ti singasing a congestion charging ket dumaldalan paylaeng iti panagadal wenno proseso ken saan pay a done deal.
Iti panakiuman iti Bombo Radyo kenni Longid, kinunana a saan pay a sigurado dagitoy nu maipatungpal ti panakasingir iti congestion fee kadagiti pribado a lugan gapu ta adda pay dagiti konsultasyon a masapol a maangay tapno masigurado nu agnumar a talaga ti publiko iti daytoy.
Sigun kenni Longid, kangrunaan a panggep ti maisingsingasing a traffic measure nga i-discourage ti panagaramat kadagiti pribado a lugan nu agturong iti Central Business District babaen iti panakasingir iti partikular a gatad.
Nupay kasta, inlawlawag ti opisyal a kagiddan ti panangdiscourage iti panagaramat iti pribado a lugan ket kasapulan metlaeng nga adda ti naan-anay nga alternatibo para iti mass mobility kas iti parapubliko a transportasyon nga iti agdama ket maysa metlaeng kadagiti kasapulan a maurnos.
Gapu iti dayta, impetteng ni Longid a sakbay a maiyimplimintar ti congestion charging, kasapulan pay a maurnos ken maisagana ti parapubliko a transportasyon iti siudad.
Ti congestion charging sigun kenni Longid ket maysa a traffic management tool a paset iti Smart Urban Mobility Project iti Baguio City nu sadino, nakapokus daytoy iti panangdiscourage iti panagaramat iti pribado a lugan nu agturong kadagiti paset iti Centra Business District nangruna ta nabayagen a naartapan t bilang dagiti lugan ti carrying capacity ti Baguio City.//Bombo Rob Dominguez
