BAGUIO CITY – Nanayonan ti contact tracers ti munisipyo ti Mankayan, Benguet.
Sigun ken Mankayan Mayor Frenzel Ayong, nakikoordinarda iti Department of the Interior and Local Government (DILG) ken Department of Health (DOH) tapno manayonan ti contact tracers ti munisipio tapno mapatibker ti contact tracing efforts nga ipatpatungpalda ken malapdan ti panagwaras ti COVID-19.
Kinunana a nanayonan iti 11 ti sigud a walo a contact tracers ti Mankayan.
Kinuna ni Ayong a manarimaan metten ti panagsanay dagiti baro a contact tracers dagitoy ken manamnama a dagus a maiwaras ken agserbi nga augmentation kadagiti immuna a contact tracers para iti napartak a pannakaipatungpal ti contact tracing.
Inlawlawag ti mayor nga adda iti posibilidad a manayonan wenno kumaro ti COVID cases sadiay Lepanto mine camp isut gapu a nainget ti monitoring kadagiti maseknan a sektor para iti pannakaisagana dagiti quarantine ken isolation facilities kasta metten kadagiti contact tracers.
