Nakasangpiten ni Mary Jane Veloso iti pagilian a Pilipinas itay agsapa kalpasan ti sangapulo ket uppat a tawen a panakaibaludna idiay Indonesia.
Nakumbiktar ni Veloso gapu iti kasona nga adda ti pakainaiganna iti iligal a droga nu sadino, inkeddeng ti gobyerno iti Indonesia ti pammapatay kas pannusa kenkuana.
Nupay kasta, babaen iti diplomacy a napasamak iti nagbaetan dagiti maseknan nga opisyales iti Pilipinas ken iti Indonesia, napatgan ti panakaisubli ni Veloso iti pagilian ken ti panakawaswas iti naipataw kenkuana a death penalty.
Immuna metten nga immawag ni Veloso iti pamilyana bayat a maiprosposeso iti panagsublina iti pagilian, banag a nakapabang-ar ken nakapagparagsak iti pamilyana.
Imbinglay met ti anak ni Veloso a nangisagana dagitoy iti adobo a baboy nga isu ti maysa kadagiti kiddaw ni Veloso kadakuada.
Kabayatanna, kinuna met ni Foreign Affairs Secretary Enrique Manalo a marka ti panakaipasubli ni Veloso iti pagilian iti naparegta a panaggayyem ken talek iti nagbaetan iti Pilipinas ken iti Indonesia.
