![](https://img.bomboradyo.com/baguio/2019/08/dengue-logo.jpg)
BAGUIO CITY – Naka-blue alert ita ti rehiyon Cordillera gapu iti nailista a nangato a kaso ti dengue ita a tawen.
Inwaragawag daytoy ni Department of Health-Cordillera Regional Director Dr. Amelita Pangilinan iti naangay nga Emergency Response Meeting on Dengue Incidences in the Cordillera Region idi kanikadua.
Sigun kenkuana, manipud January 1 agingga July 20 ita a 2019 ket nakailistada iti 3,458 a suspected dengue cases iti entero a rehiyon.
Kinunana a nangatngato ti nasao a bilang iti 21% no idilig iti kapada a panawen idi 2018.
Nailista ti Ifugao ti kadakkelan a panagngato iti kaso ti dengue iti dumanon 206% bayat a nailista ti Apayao ti kangatuan a kaso ti dengue a dumanon iti 642.
Nakailista pay ti rehiyon iti pito nga ipupusay gapu iti dengue ita a tawen.
Sigun kenni Dr. Pangilinan, nangisayangkatdan iti nagduduma a dengue prevention and control measures tapnu malabanan ti dengue kagiddan ti panangipalpalagipda iti publiko iti panangpatalinaed dagitoy iti nadalus nga aglawlaw tapnu awan ti pagpa-aduan dagiti lamok a nakaimet iti nagduduma a virus, pakairamanan ti dengue virus.