Impakaammo ti kapulisan idiay Cotabato City nga iti kaunaan a gundaway kalpasan iti 25 a tawen ket awan ti nailistada a kaso iti firecracker-related injury kabayatan ti panakarambak ti Paskua ken panakasarabo ti baro a tawen.
Sigun kenni Cotabato City Police Director Colonel Jibin Bongcayao,awan ti nadangran gapu iti paputok kadagiti umili sadiay ken awan metlaeng ti nagpaputok iti paltog.
Iti baet a naobserbaran latta ti panakaaramat dagiti paputok ken pyrotechnic devices, kinuna ti opisyal a nagtalinaed dagitoy iti limitasyon nga imanmandato ti paglintegan.
Gapu iti dayta, kinomendaran ti opisyal dagiti kameng iti pulisya ken dagiti opisyales ti nagduduma a babbarangay sadiay gapu iti panagreggetda para iti kampanya kontra iti iligal a paputok ken pyrotechnics iti nasao a lugar.
