BAGUIO CITY – Nagnumar ti nasurok 10,500 a private workers ditoy Cordillera Region iti COVID-19 Adjustment Measures Program (CAMP) ti Department of Labor and Employment (DOLE).
Iti interbyu ti Bombo Radyo, kinuna ni Exequiel Ronnie Guzman, regional director ti DOLE-Cordillera a babaen iti nasao a programa ket maipaayan dagiti benepisario iti P5,000 a tulong pinansial.
Kinunana a ti pakabuklan a 10,516 nga empleado a nagnumar iti programa ken nagtaud dagitoy iti 688 nga establisiemento wenno kompania iti nagduduma a paset ti Cordillera.
Dinakamatna a P52 million ti naipaluspos a pondo para iti pinansial a tulong kadagiti nasao a pribado nga empleado.
Sigun pay iti opisial, adda ti manarimaan a maipoproseso nga aplikasion ti nasurok 40,000 nga empleado manipud iti nasurok 2,500 nga establisiemento iti rehion.
Kinunana nga agkasapulan iti nasurok P201 million a pondo dagiti nasao nga aplikasion.
Kualipikao iti programa a CAMP dagiti empleado iti pribado a sektor a naapektaran iti mapaspasaran a krisis ken ti enhanced community quarantine gapu iti COVID-19.
