BAGUIO CITY – Nanayunan pay ti kaso ti ipupusay ditoy siudad ti Baguio gapu iti COVID-19 kalpasan a pimmusay ti 2-days old a maladaga a babai idi laeng kalman, August 12.
Gapu iti daytoy, dumanonen iti walo ti bilang dagiti pimmusay iti rehion Cordillera gapu iti COVID-19 ken dagitoy ket bukbuklen ti innem a kaso iti Baguio City ken saggaysa a kaso iti Benguet ken Abra.
Maibasar iti rekord, ti kaudian a kaso ti ipupusay ditoy siudad ti kaubingan a pasyente ti rehion a pimmusay gapu iti COVID-19.
Kabayatana, nailista ti rehion Cordillera ti 14 a kanayunan a kaso ti COVID-19 idi kalman, no sadino 10 ti nailista iti Baguio City, tallo sadiay Benguet ken maysa sadiay Kalinga.
Nanayunan met dagiti naimbagan manipud iti nasao a sakit kalpasan a nailista ti panagimbag ti 18 a pasyente idi kalman a bukbuklen ti 11 sadiay Abra, lima ditoy Baguio City ken dua sadiay Kalinga.
