BAGUIO CITY – Ad-adda a sumaysayaat ti COVID-19 vaccination program ti Baguio City.
Sigun kenni Mayor Benjamin Magalong, kasaruno daytoy ti panakainayon ti maysa a vaccination center kadagiti tallo nga agdama a vaccination sites ti siudad.
Kinunana a babaen iti daytoy ket mapasayaat ti vaccination coverage ti Baguio kas panagsagana iti manamnama a panakaisangpet ti adu a suplay ti bakuna kontra iti COVID-19 kadagiti masungad a bulan.
Dinakamatna a ti makapat a vaccination center ti siudad ket masarakan iti parking building ti SM Baguio a nangrugi a naaramat idi pay May 11.
Maipalagip a dagiti immuna a tallo a vaccination mega centers ti Baguio ket iti gym ti University of Baguio, main gym ti Saint Louis University ken iti Saint Louis School, Inc. nga addaan ti sag-innem a vaccination teams.
