Agtultuloy ti panangipaay ti Department of Agriculture kadagiti nagduduma nga assistance para kadagiti mannalon partikular paylaeng iti rehiyon Cordillera.
Iti mensahe ni Department of Agriculture Secretary Francisco Tiu Laurel Jr. nga imbasa ni Dr. Arlene Sagayo iti Department of Agriculture Cordillera, kinuna ti secretary nga agtultuloy ti pannangipaayda kadagiti planting materials, ultraviolet plastic sheets, inorganic fertilizers, essential farming tools kas kadagiti nurseries, coffee pulper, moisture meters ken post harvest equipment.
Babaen kadagitoy nga intervention ket matulunganda dagiti nagduduma a mannalon iti rehiyon Cordillera iti panagtalonda.
Maipalagip nga idi napalabas a tawen, nakaipaayda kadagiti nagduduma nga assistance iti 12,928 resilient a lallaki a mannalon ken 13,873 a babbai.
Kagiddan dayta, nakaawat metlaeng dagiti La Trinidad Cutflowers and Ornamental Plant Growers Association iti polyethelene sheets nga agbalor iti P320-K manipod iti Department of Agriculture itay laeng nabiit.
Daytoy ket para iti agtultuloy a suporta ti ahensya iti cut flower production iti munisipyo ti La Trinidad.
Babaen met iti Bureau of Plant industry ket naipaayan iti naan-anay a suporta dagiti strawberry farmers iti munisipyo ti La Trinidad ken adda ti naipaay kadakuada a 4,500 strawberry runners idi napalabas a tawen ken manamnama ti 8,500 strawberry runners a maipaay kadakuada ita a tawen.
