KALINGA PROVINCE – Manamnama a maipatungpal ti dadakkel nga aktibidad para iti Buhay Ingatan, Droga’y Ayawan (BIDA) program ti Department of the Interior and Local Government (DILG) iti sumaruno a dua a bulan idiay probinsiya ti Kalinga partikular idiay Tabuk City.
Iti interview ti Bombo Radyo kenni Araceli San Jose, Regional Director ti Department of the Interior and Local Government, karaman kadagiti maimbitaran para iti nasao nga aktibidad ket dagiti local government officials, church leaders, kameng ti Department of Justice pakairamanan dagiti judges ken prosecutors, agtutubo ken dadduma pay.
Panggep ti aktibidad a maaddaan ti multi-sectoral dialogue tapno agbalin a naballigi ti kampanya kontra iti ilegal a droga sadiay.
Guyguyoguyen met ni Director San Jose ti publiko nga ibinglay dagitoy ti ideya ken suhestiyonda tapno agballigi pay ti kampanya kontra iti droga iti intero a pagilian.//Bombo Jez Lapizar
