BAGUIO CITY – Iyap-apela ti Baguio City Health Services Office ti dagus a panagkonsulta dagiti indibidual a makapaspasar kadagiti early symptoms wenno umun-una a sintomas ti COVID-19.
Sigun kenni City Health Officer Dr. Rowena Galpo, mabalin nga agpakunsulta dagiti maseknan kadagiti kaasitgan a health facility iti lugarda tapnu maipasigurado nga umno ti panakaduktal ti rason ti rikriknaenda.
Kinunana a nasken a saan a pagbutngan ti nasapa a panagpakonsulta kadagiti mangngagas tapnu maliklikan ti aniaman a komplikasyon ti rikriknaenda a posible a mangitunda iti ipupusay.
Iyap-apelana ti nasao nga aksion kalpasan ti killaat a panagngato ti bilang ti ipupusay ditoy siudad nga addaan koneksion iti COVID-19 ken kaaduan kadagiti pimmusay ket dagiti adda iti elderly age bracket wenno dagiti natataengan malaksid a kaaduan a sakitda a sakbayda a nakaptan ti COVID-19 ket hypertension ken diabetes.
Inyulit manen ni Dr. Galpo a karaman kadagiti sintomas ti COVID-19 ket ti panag-uyek, gurigor, sore throat, panagibleng, panakapukaw ti panagraman ken panag-angot, nakaro a panakabannog, panagsakit ti ulo, panagbakwar ken narigat a panag-anges.
Kabayatanna, naituding nga agtaripnong dagiti maseknan nga opisina iti lokal a gobyerno ti Baguio ken dagiti health experts ken dadaulo dagiti ospital ditoy siudad tapnu mabigbig ti rason iti killaat a panagngato ti ipupusay a konektado iti COVID-19 kadagiti napalpalabas a lawas tapnu mabukel ti umno nga istratehiya tapnu maprebentaran ti nasao a sitwasyon.
