BAGUIO CITY – Kasapulan a dagus a maipaka-ammo iti Social Security System (SSS) ti baro a bank account number dagiti miembro ken pensioners ti ahensia.
Inyunay-unay daytoy ni Christian Andrew Rillorta, Regional Communications Officer ti SSS Luzon North 1 Division kasaruno ti reklamo ti maysa a senior citizen a saan a panakaipaay ti pension daytoy iti uneg ti adu a tawen.
Nagkamang iti Bombo Radyo ti nasao a senior citizen tapnu ireklamo ti maatap a saan a panangited ti SSS iti pensionna idi pay 2014.
Nupay kasta, naduktalan met kabayatan ti dayalogo ti senior citizen ken ni Rillorta a dumanon iti uppat a daras a napukaw ti ATM card daytoy ken uppat pay a daras a nagsukat ti bank account number.
Naamuan a saan nga impakpaka-ammo ti pensioner iti SSS ti nasao nga impormasyon isu’t gapuna a ti orihinal a bank account number a nakarehistro iti SSS Baguio ti nakaitintinnagan ti pension daytoy.
Inlawlawag ni Rillorta a nasken a maipaka-ammo a dagus iti SSS dagiti panagbaliw iti detalye ken bank account number ti maysa a miembro wenno pensioner ti ahensia tapnu maisimpa ti record daytoy.
Naipaayan met iti form ti nasao a senior citizen para iti panaka-update ti impormasyon-na sadiay SSS Baguio tapnu maitinnag ti pensionna iti kabaruan a bank account daytoy.
